大夫行傳: 錫克教（英文：Sikhism）

錫克教（英文：Sikhism）係喺16世紀印度西北部旁遮普地區，

一個叫納那克祖師嘅人始創嘅一個宗教。

最初錫克教係為咗調和印度教同伊斯蘭教嘅衝突而產生出嚟，試圖以和平、

溫和嘅方式建立一個超越教派嘅統一宗教。

但後來由於錫克教出咗個叫「卡爾沙」嘅軍事教團，令錫克教變成一個崇武嘅宗教。

錫克教係一個一神論宗教，祖師納那克認為 :

神係宇宙唯一創造者、全能全知、公正仁慈，而且係唯一、永恆，

至於其他唔同宗教所敬拜嘅神，只係同一個神有唔同嘅稱呼咁解。

錫克教反對偶像崇拜同儀式，所以錫克廟入面唔會有任何神像，

只有一本《阿底格蘭特》係錫克教嘅聖典。

錫克教有套祖師制度 :

佢哋認為祖師係神嘅使者，人一定要喺祖師指導之下修行，先可以解脫。

錫克教徒鍾意一齊食飯，呢個習慣來自佢哋集體就餐制度。

錫克教5K制規定唔剪頭髮或者鬍鬚，所以一世人都唔會剪髮，留長頭髮，

出街時捲埋一個蛇餅用布包實，即係廣東話叫嘅「包頭」。

「錫克」係梵文 Sikha 同旁遮普文 Siikh 音譯，意思係門徒，

即係話信錫克教嘅人都係祖師嘅門徒。

另一個解譯話「錫克」係旁遮普文 Sikhna，即係解學習，

即係話錫克教教徒都係一生學習同追隨咁解。

錫克教係15世紀響印度教巴克提派嘅虔信運動（梵天信仰）

同伊斯蘭教蘇菲派嘅共同基礎上產生。

1469年由第一代祖師拿那克（Nanak）創始。

聖地響旁遮普邦阿姆利則市，呢度有錫克教最大寺廟——大金廟。

「錫克」響梵文嘅原意係「門徒」咁解，因呢個教嘅教徒自稱祖師嘅門徒。

早期實行祖師制，響第十代祖師後被廢除。

18世紀初分成易行派同獅子派兩個派。

錫克教強調人人平等，男人之間都係兄弟，女人之間都係姐妹。

佢哋奉行嚴格嘅一神論，同埋會禮拜幾代祖師。

響莫臥兒帝國統治時期，教徒多次掀起發對專制主同莫臥兒國家嘅鬥爭。

響英國統治時期，曾經多次展開反英鬥爭。

1947年印巴分治之後，印度信仰呢個教嘅錫克人掀起咗伽里斯坦運動（Khalistan）。

1980年代錫克教民兵拒絕解除武裝，逐漸發展做地方軍閥，變成「國中國」，

印度政府唔妥佢哋，就發動咗藍星行動，解除咗錫克民兵嘅武裝。

錫克教發展過程之中，總共出過十位祖師，

第一個祖師叫納那克，佢亦係錫克教創教人。

納那克戴夫（Nanak Dev）係錫克教創教人，關於納那克歷史上無乜記載。

根據錫克教相傳，納那克喺1469年4月15號

喺旁遮普 塔爾萬提村一個印度教家庭出世。

有日佢喺條河度沖沖吓涼唔見咗，全村人博命搵都搵唔到佢，

三日之後突然間出現返，之後一路唔講嘢，到開口講嘢時第一句說話就係：

「無印度教徒，亦都無穆斯林」之後佢講返自己經歷，

話沖沖吓涼突然送咗上天堂，天神畀咗杯甘露佢飲，話：

「你飲咗之後，我就與你同在」最初啲人當佢痴線，

但係佢嘅行為就激到好多穆斯林都好嬲。

有日佢召咗入宮見土邦王，啱啱佢哋做緊禮拜，個個都跪低祈禱，

係得納那克無跪，之後佢話：

「真主無接受佢哋祈禱」然後慢慢解釋宗教儀式無用，

土邦王聽完之後覺得好有道理，重話要將王位讓畀佢，但納那克無受到，

之後個土邦王就成為納那克第一個弟子。

納那克死咗之後，選咗安格德做指定承繼人，成為第二代祖師。

1552年安格德又搵咗阿瑪爾做指定承繼人，成為第三代祖師，

喺佢領導之下發展出錫克教集體就餐制度。

1574年阿瑪爾死之前又將祖師傳咗畀拜傑特，佢做咗祖師之後，

改名做拉姆，成為第四代祖師，佢做咗7年祖師，

其間帶領信徒搵咗好多個甘露池，同時開咗好多傳教路線。

拉姆將祖師傳咗畀佢細仔阿爾瓊，成為第五代祖師，佢係第一個畀皇帝處死嘅祖師，

佢死咗之後由佢個仔哈爾戈賓德接任成為第六代祖師，

由於阿爾瓊嘅死令佢覺得錫克教唔可以再任人宰割，於是開始咗錫克教尚武時期，

曾經殺死一隻老虎救返賈汗德皇帝一命，點知後尾畀賈汗德皇帝送咗去古城囚禁，

放返之後周圍傳教，放咗好多時間去組織同訓練軍隊，最後佢喺深山過隱居生活。

哈爾戈賓德將祖師傳咗畀佢個孫哈爾萊，成為第七代祖師。

之後哈爾萊將祖師傳咗畀佢個二仔哈爾克里森成為第八代祖師，當時佢只得5歲，

佢最後因為天花而死，死嗰陣8歲，所以無兒無女，亦無指定承繼人，

不過佢死之前拎住一個椰子同五個銀仔，根據呢啲線索，

搵到泰格巴哈杜爾接任第九代祖師，期間旁遮普因為政府宗教政策，

對伊斯蘭教以外嘅宗教壓迫，原本只係針對印度教，後來連錫克教都波及埋，

泰格巴哈杜爾畀人捉去逼改信伊斯蘭教，

但佢死都唔肯，結果畀人斬頭，成為第二個殉教嘅祖師。

泰格巴哈杜爾死咗之後，由佢9歲個仔戈德賓辛格接任成為第十代祖師，

之後佢曾經領導錫克教軍隊，打贏過好多場仗，

1699年佢頒布法令，成立一個叫「卡爾沙」嘅軍事教團，其間創立咗5K制度，

不過佢一生花最多時間喺整理聖典，最後編咗成套《阿底格特》出嚟，

宣佈祖師傳到佢就唔再傳，以後《阿底格蘭特》就係十世祖師象徵，

最後佢喺1708年10月7號死。

錫克教最初係由印度教巴克提發展出嚟，

創教祖師納那克又同時熟讀伊斯蘭教嘅《古籣經》，

喺印度教基礎上，結合伊斯蘭教蘇菲派思想，最後變成自成一格嘅宗教。

錫克教基本教義簡單以三個觀念構成：「神、師尊、真名」，

神即係指唯一嘅神，無論你信邊個教，其實都係同一個神。

師尊即係指十大祖師，或者一本《阿底格特》代表晒。而真名就即係神嘅顯現形式。

另外有四條教規：

唔畀食煙同飲酒。
一夫一妻神聖婚姻
唔可以拜偶像
終身遵行5K，即係五件事：留長頭髮（Kesh）；戴髮梳（Kanga）；着短褲、長衫過膝（Kachhera）；佩短劍（kirpan）；戴鐵手鈪（kara）；呢五件事嘅第一個字母都係K字頭，所以叫5K，意思即係將道德、精神同軍事結合。

重有其他禁忌：

唔可以殺生獻祭：娑提（寡婦響葬禮跳落火度同老公殉葬）同儀式性動物獻祭都係唔准嘅。
生活方式：錫克教徒唔可以做隱士、乞兒、瑜伽士、修行者（修士或者修女）又或者獨身者，應該要做聖戰士。
無聊話：吹水、講大話、誹謗同督背脊後中傷都係唔准嘅。Guru Granth Sahib告誡錫克教徒：「你把嘴如果係咁誹謗人同埋講人是非，你幾多付出都係冇用同冇好結果嘅。」
冇神權階層：錫克教唔會有教職人員，佢哋都畀Guru Gobind Singh（錫克教第十位古魯）廢除咗。唯一有得留低嘅職位係Granthi，負責照顧Guru Granth Sahib，任何錫克教徒都可以做Granthi，接受Guru Granth Sahib嘅教誨。
食用儀式殺死嘅動物啲肉：錫克教徒唔可以食通過宗教形式殺死嘅動物啲肉（叫做Kutha肉，動物被割喉後失血過多死亡），，或者唔清楚背景嘅肉。錫克教徒所食用的肉被稱為Jhatka肉。

錫克教只崇拜一個神，係個一神論宗教，佢哋理解嘅神有幾個特點：

獨一無二、宇宙唯一創造者、全能全知、公正仁慈。

創教祖師納那克認為，唔同宗教嘅人，大家拜嘅神，

唔理你話係印度教個摩羅定伊斯蘭教個亞拉，其實都係同一個神。

錫克教出自印度教，所以亦有輪迴之說，即係話，

今世做好事下世會有好報，今世做壞事，下世會有惡報。

一定要積德行善，下世先有機會修行成人。

人有自由意志去決定做好事定壞事，但因為有摩耶阻住，所以睇唔到真理，

無辦法認識神，摩耶意思，即係「幻覺」，只有通過祖師嘅教導，

先可以突破呢啲幻覺，達到天人合一境界。

錫克教同印度教一樣，以解脫作為終極信仰目的，錫克教認為，

人生出嚟就係要受苦受難，然後喺痛苦之中解脫。

錫克教提倡人人平等、勞動價值、非暴力，佢哋反對性別歧視同偶像崇拜，

亦都反對麻麻煩煩嘅祭祀儀式。

錫克教鼓勵教徒投入社會生活，同時推崇勞動價值，認為不勞而獲等如寄生蟲。

佢哋認為職業無貴賤之分，只要係自食其力，又肯同人分享成果，就係正確生活道路。

佢哋容忍唔到一個人無所事事。

錫克教提倡一夫一妻制，雖然亦可以離婚，但唔鼓勵。

女性地位同男性一樣，可以一齊讀經，又可以擔任宗教聖職。

錫克教最重要嘅聖典係《阿底格蘭特》（Adi Granth），

又或者叫做《格蘭特沙哈布》（Granth Sahib），阿底格蘭特意思係「原初經典」，

由五世祖師阿爾瓊在位嗰陣開始編，最後由十世祖師戈德賓辛格完成。

呢本嘢內容乜都有，主要係講錫克教教義，每一世祖師寫嘅讚歌，

總共夾埋有3384首讚歌，15575詩節。

聖典主要係用旁遮普文夾雜梵文、古吉拉特文、印地文、馬拉地文、波斯文寫成。

由於錫克教反對形像崇拜，所以錫克教嘅寺入面無任何神像，

只有本《阿底格蘭特》用嚟拜，由於第十世祖師戈德賓辛格取消咗祖師制，

所以《阿底格蘭特》就變咗十世祖師象徵。

除咗《阿底格蘭特》，錫克教重有一本《十祖聖典》，

係由第十世祖師戈德賓辛格編，1734年完成。

公社即係卡爾沙（Khalsa），意思即係純潔，指嘅係國土。

卡爾沙由第十世祖師戈德賓辛格設立，之前錫克教以教區（Sangat）組織，

即係每個區有一個教主，但後來啲教主慢慢權力越嚟越大，有啲重威脅到祖師嘅權威，

於是戈德賓辛格就以卡爾沙取代教區制，跟住又定五種教規，叫做「5K制」。

加入錫克教只要通過一個「劍禮儀式」，就會成為卡爾沙成員。

集體就餐係錫克教一大特式，由第三世祖師阿瑪爾定出嚟，

佢原意係打破印度傳統嘅種姓隔離制度而嚟，

種姓隔離制度係將人分成唔同階層，然後每一種人都唔可以一齊。

錫克教因為反對呢種制度，所以搞呢個集體就餐制，

唔理乜嘢人，有乜嘢宗教背景，都走埋一齊食飯，

三世祖師阿瑪爾重試過請到皇帝同平民一齊食飯。

而家嘅錫克教仍然會開好多公共餐廳，畀啲窮人入去同佢哋一齊食飯。

錫克教徒以印度旁遮普嘅旁遮普人為主，因為宗教而變成一個民族，叫錫克人。

錫克人亦最多喺印度旁遮普地區，但亦有分佈喺全世界唔同地區。

由於錫克教尚武嘅傳統，錫克人好多都鍾意入軍隊做軍人，

印度軍隊入面佔大半都係錫克人，而喺分佈喺其他國家嘅錫克人，

都係傾向於搵返類似嘅工作，例如軍隊或者保安之類。

錫克人認為身體係神嘅創造，所以唔會飛髮，留到頭髮長一長，出街時捲埋一個蛇餅，

然後用布包實，即係廣東話俗稱叫「包頭」，行出街一認就認到，同時亦留到滿面鬍鬚。

錫克女人都鍾意着一種叫旁遮普服嘅傳統服裝。

錫克人道德觀念同自律性都好強，平時都好有禮貌。

自從第十世祖師戈德賓辛格要求所有錫克人喺受洗後，

都要加「辛格」（Singh）喺個名後面，意思係「獅子」，象徵虔誠、勇敢、犧牲精神。

之後所有錫克人個名都有辛格。

受洗女嘅姓「考爾」（Kaur），意思係「公主」。

香港同新加坡亦有好多錫克人，但因為多數人都唔識錫克人講嗰啲話，

辛格個發音Singh同廣東話「星」同音，慢慢錫克人喺廣東話就有個俗稱叫「亞星」。

印度獨立之後，錫克人諗住旁遮普可以有一個獨立自治邦，有自己一個錫克教地區，

點知當時尼魯赫政府大隻講唔算數，令錫克人開始產生民族主義思想，

爭取一個自治邦成為錫克教宗教領袖嘅一個主要議題，由於太多參與政治鬥爭運動，

所以喺教義同宗教理論上都無乜嘢搞過。

1970年代旁遮普地區喺農業經濟發展上面快速成長，即所謂「綠色革命」，

旁遮普生產高級糧品佔全印度幾乎一半，令旁遮普得到一個外號叫「印度糧倉」，

由於經濟地位提高咗，自治嘅要求又成為議題，

1973年通過「阿南德普爾決議」，將旁遮普語地區劃做一個「旁遮普邦」，

但政府遲遲都唔肯落實，就算發動過好多遊行示威，政府都係用強硬手段拉人封艇。

結果搞到部份錫克人開始激進，重開始出現以恐怖手段爭取獨立，暗殺、爆炸、搶劫等，

令旁遮普治安變差，呢啲組織之中，以賓特蘭瓦爾嘅組織最大，

呢班人主要匿喺金廟入面。之後印度政府發動「藍星行動」，

衝入錫克教認為最神聖嘅金廟入面拉人，期間對金廟造成好多破壞，

令鍚克教同印度教結怨，開始發生好多教派仇殺。

旁遮普問題到而家都仍然未解決，係印度政府一個辣手問題。

錫克教有自己獨特文化同節日，不過由於錫克教係由印度教演變出嚟，

所以有啲節日都係喺印度教度嚟，同埋以印度曆計，

例如燈節（即係新年）同灑紅節都係印度教節日。

另外，祖師誕辰係錫克教最主要節日，

其中以創教祖師納那克誕辰同第十世祖師戈德賓辛格誕辰最大件事。

寺廟係錫克教徒去敬拜嘅地方，傳統上錫克教徒要日日去上香禮拜，

不過而家啲人因為要返工，所以只會放假先去，

錫克教嘅寺廟通常都係白色同圓頂，門口掛住一支黃色嘅旗。

錫克教嘅寺廟有兩種，一種係畀教徒做宗教活動而起，另一種就類似聖地咁，

呢類通常起喺祖師誕生或者殉難嘅地方，呢類都係屬於古蹟兼係錫克教聖地。

十位祖師生卒年一覽